Shkolla e Magjistraturës

Shkolla e Magjistraturës, në bashkëpunim me Këshillin e Evropës, më datë 21 mars 2025, zhvilloi aktivitetin trajnues me temë: “Shpronësimi si mënyrë për humbjen/fitimin e së drejtës së pronësisë mbi sendet e paluajtshme. Kriteret që duhet të përmbush kjo procedurë për të garantuar respektimin efektiv të së drejtës kushtetuese të përcaktuar në nenin 41 të Kushtetutës së RSh-së. Evolumi i praktikës gjyqësore të gjykatave shqiptare dhe GJEDNJ-së. Kufizimet e tjera në ushtrimin e së drejtës së pronës sipas legjislacionit shqiptar. Procedura administrative për realizimin humbjen/fitimin e së drejtës së pronësisë mbi sendet e paluajtshme dhe regjistrimi i tyre pranë regjistrave të pasurive të paluajtshme në administrim prej Agjencia Shtetërore e Kadastrës”, pranë ambienteve të Shkollës së Magjistraturës, në Tiranë.

Ky aktivitet u drejtua nga:

Ekspertë: Fiona Papajorgji, Arbena Ahmeti dhe Viktor Gumi

Lehtësues: Erind Mërkuri

Qëllimi i këtij trajnimi është: Përcjellja e praktikës gjyqësore të Gjykatës së Lartë dhe Gjykatës Kushtetuese për raste gjyqësore së fundmi për procedurat shpronësuese brenda standardeve kushtetuese dhe konventore. Rregullimet ligjore pas ndryshimeve të pësuara në vitin 2020 në ligjin e posaçëm për shpronësimet dhe koordinimi midis disa rregullimeve për procesin e regjistrimit të të drejtave të pronës. Standarde të vendosura prej GJEDNJ-së për të drejtën e pronësisë dhe rastet e kufizimit të kësaj të drejte.

Trajnimi u realizua duke ndërthurur prezantimet (deri në 20-30 min) me diskutimin e çështjeve të shtruara (pyetjeve vetë studimore; pyetje-përgjigje) dhe ushtrimeve me raste praktike & kuize, për të nxitur dhe realizuar ndërveprimin aktiv të pjesëmarrësve.

Gjatë këtij aktiviteti trajnues u trajtuan tema të ndryshme, si:

Mënyra e formulimit të dispozitave kushtetuese që garanton të drejtën e pronës;
Trajtimi i kufizimeve të pronës nga Gjykata Kushtetuese në rrugën e kontrollit abstrakt;
Gjykimet mbi ligjin nr.133/2015 “Për trajtimin e pronës”;
Trajtimi i kufizimeve të pronës nga Gjykata Kushtetuese në rrugën e kontrollit konkret;
Cenimi i pronës pa proces të rregullt ligjor;
Shpronësimet me/pa interes publik; Mungesa e shpërblimit të drejtë;
Cenimi i pronës si e drejtë materiale;
Paraqitja e rasteve Gjyqësore të trajtuara nga Gjykata Kushtetuese;
Elementët ligjorë, autoritet shtetërore përgjegjës si dhe procedurat ligjore për realizimin e shpronësimit, sipas standardeve më të mira. Kufizime të tjera të të drejtave të pronësisë sipas ligjeve të posaçme.
Ankimi gjyqësor për masën e shpërblimit të pronës objekt shpronësimi dhe praktika gjyqësore;
Prezantimi i nevojës për kalimin në njësim të praktikës gjyqësore, në lidhje me afatin e paraqitjes së padisë administrative në rastin e realizimit të procedurave shpronësuese;
Paraqitja e rasteve gjyqësore të trajtuar në Kolegjin Administrativ;
E drejta e pronës sipas Protokollit nr.1, neni 1 të KEDNJ;
Ndërhyrjet në zotërimin e pronës;
Detyrimet pozitive të shteteve;
Jurisprudenca e GJEDNJ-së.

Në këtë aktivitet trajnues morën pjesë gjyqtarë, prokurorë, avokatë shteti dhe avokatë të Republikës së Shqipërisë.

21.03.2025 - AKTIVITET TRAJNUES: “Shpronësimi si mënyrë për humbjen/fitimin e së drejtës së pronësisë mbi sendet e paluajtshme.”